ՀԱՅԱՍՏԱՆԻ ՃԱՄՓԵՔԻՆ - Անասնապահությունն ու դաշտային աշխատանքները դարձել են Հայկի ընտանիքի գոյատևման հիմնական միջոցը: Հայկն ու կինը՝ Սուսաննան, որևէ աշխատանքից չեն խուսափում ու լուռումունջ կատարում են անգամ անցանկալի գործերը: Վաստակած 40.000 դրամով Գրիգորյանները հասցնում են միայն հաց գնել: Արդեն 1 ամիս է` Գրիգորյանները Արմավիրի մարզի Լենուղի գյուղում են: Հայաստանի տարբեր վայրերում հաստատվելով ու տարբեր ֆերմաներ փոխելով՝ նրանք ապաստան ու աշխատանք են փնտրում: Ծնողների տեղափոխություններին մասնակից են դառնում նաև նրանց 4 տարեկան դուստրը՝ Լուսինեն ու 2 տարեկան տղան՝ Ռոբերտը: Չնայած բազմաթիվ դժվարություններին ու հոգսերին՝ ընտանիքում ընդգծված սեր ու հարգանք կա միմյանց նկատմամբ: