Աղոթք

Տեր, տուր մարդկանց արդարություն,
Տեր, տուր մարդկանց ազնվություն,-
Արդարության պակասն հա կա,
Ազնվությունն՝ անենթակա:

Տեր, շատ որոմ կա այս հողում,
Ոսկին խղճի տեղն է շողում,-
Ագահության երախն է բաց
Խորթ բարքեր են անօրինաց:

Տեր, տուր նաև ինձ հոգու լույս,
Որ բաժանեմ մարդկանց՝ անհույս,-
Հարատևի բարին անվերջ
Այս աշխարհի չարության մեջ:

Ծաղկաձորյան էսքիզներ

Ցանկություն

Ա՛խ, անտառային ծաղկանկար,
Տերևաթափվող տխուր ծառեր,
Ձեր դեղնաերանգ ֆոնի վրա,
Մեկը այս պահին ինձ նկարեր,
Որ ես ապրեի երկա՜ր, երկա՜ր
Ձեր ֆոնին՝ դառած գեղանկար:

Լեռը

Այսպիսին էր լեռը՝
Միշտ նայում էր երկինք,
Երբ տարիներ առաջ՝
(Հազարավոր),
Նրա ստորոտում
Թաղում էին մի արքայազնի:

Այսպիսին է լեռը
Հազար տարի հետո՝
(Դեռ նայում է երկինք),
Թեև ստորոտում
Գոյացել է մի մեծ գերեզմանոց: