Сообщение:#454 Генрих Бабаджанян » 27 ноя 2016, 17:37
.
ԱՇՆԱՆԱՅԻՆ ՌԱՊՍՈԴԻԱ
Տերցին*
Աշնան շողն արևի իջել է պաղ ափիս,
Խտուտ պիտ տամ նրա նուրբ կողերը դեղին,
Այսօր ջերմ է անչափ և բարի է Արփիս:
Հագել՝ կեչին ոսկի, դեղնաբոսոր՝ թեղին,
Զույգ եղևնուց ձորի կանաչ թույր է ծորում,
Կաթկթում է դեղնած ընկուզենու լեղին:
Քամին դավ է նյութում կաղնիների ձորում -
Անդունդ պիտի տանի գորգը տերևների՝
Գրկած մառախուղի շղարշները ծորուն:
Թուխպն է քերծից կախվել. նման է կեղծ նեռի,
Նա պատնեշ չի դառնա տերևներին նախշուն,
Սպանդանոց տանող առաջնորդ է՝ ների:
Առուն՝ ձորը մտած, հին մամուռն է մաշում,
Տանում իր հետ չորուկ պտուղները մոշի,
Նրա հունին թեքված ծամ-վարսերից քաշում:
Դեպի կիրճն է տանում՝ նման խավար խորշի:
Պաղ զեփյուռ է գալիս ճերմակ հագած սարից,
Որ դեղինը աշնան փոխի անդուր գորշի:
Ընկավ ձորն արևի շողը մամռոտ սալից,
Աշնան բուրմունք եկավ սաղարթներից սոսի,
Ափս կուչ է եկել վաղվա՝ չեկած, սառից:
*Տերցին - (իտալերեն terzina, terza rima - երրորդ հանգ), եռատող բանաստեղծական տան տեսակ, ունի հանգավորման կայուն ձև՝ aba, bcb, cdc, ded... yzy ... և այլն: Ստեղծվել է միջնադարյան իտալական պոեզիայում, ապա տարածվել այլ երկրներ։ Ամբողջովին տերցետներով է գրված Դանթեի «Աստվածային կատակերգություն» պոեմը։ Հետագայում տերցետների կիրառումը դուրս չի եկել փորձի և ոճավորման սահմաններից։